報應到？海報被瘋狂二次創作　張敬軒變「張勁Key」

創意無限嘅張敬軒曾經反串惡搞過容祖兒同倪晨曦，啲女裝造型仲維肖維妙攞滿分，而今次佢可謂被「以其人之道，還治其人之身」，皆因連佢自己所屬間英皇公司都玩埋一份，搞咗個「軒公演唱會特別企劃」，將佢為咗宣傳嚟馬12月跨年紅館演唱會，而克服畏高症攀上成64層樓嘅避雷針嗰張海報相嚟惡搞。

個企劃開始咗幾日，啲網民反應超熱烈，同埋二次創作啲「P圖」真係好抵讚，佢哋主要攞咗軒仔嗰張企喺天比高嘅避雷針塔上，攤開隻臂仲笑住向上望鏡頭嘅相嚟無限Key，將個背景無限轉變仲加插圖，令佢喺好多經典電影同電視劇度出現變身作為「張勁Key」。

好似有軒仔分別喺電影《哈利波特》、《沖天救兵》、《仙樂飄飄處處聞》及近期hit爆嘅《魷魚遊戲》場景出現，仲有一個真係要畀100分，就係軒仔出現喺電影《大白鯊》嗰個場口，佢喺大白鯊個血盆大口度衝出嚟，畫面逼真又搞笑，唔知軒仔又最like邊個惡搞圖呢？