「左麟右李」想當年　李克勤踎TVB停車場寫出《紅日》

「左麟右李」李克勤譚詠麟早前各自喺社交網宣布合體，而前晚（22日）《時光音樂會》第1集中終於見到佢哋聚首，同場仲有林志炫、許茹芸等等，雖然節目冇小鮮肉兼冇性感女，而且被網民笑言平均年齡47歲，但收視三網第一，連重播時段收視都係首位，口碑唔錯，仲有成逾21個熱搜引起網友激烈討論，評價都係一致力讚，最勁嘅係官媒都發文，指節目以經典音樂傳遞正能量，背後故事溫暖人心等。

第1集中，「左麟右李」分別演唱首本名曲《朋友》同《紅日》，各自憶當年，克勤選擇穿越去1992年，創作《紅日》嘅年份。當年克勤與袁詠儀拍攝無綫劇集《他來自天堂》，同時負責寫主題曲歌詞：「我記得有一天晚上，電視劇拍攝收工的時候，已經是半夜三點了，歌詞被催着要趕緊出來，所以我就坐在了TVB的停車場裏開始寫。」

克勤不斷見到藝人下班返屋企，一直寫到天光，又見到藝人上班：「那個時候我在想，為甚麼別人都有收工的時候，只有我坐在這裏不能回家，我的命運怎麼這樣顛沛流離。」於是有感而發寫下了這些歌詞。