炎明熹人氣蓋過姚焯菲 粉絲開設「明Gi台」

2021年10月24日 22:02
東網電視
更多新聞短片
無綫節目《聲夢傳奇》兩位學員炎明熹(Gigi)及姚焯菲(Chantel)人氣高企,連粉絲嘅應援攻勢都不相上下,不過原來有「Gi炎粉」默默成立網上電視台頻道「明Gi台」,包辦攝影、剪接等製作,採訪Gigi大大小小嘅活動,甚至成功同Gigi做獨家專訪,相當專業,似乎比「小菲象」略勝一籌。
「明Gi台」成立短短兩個幾月,已經推出咗10條影片,當中題材包羅萬有,除親身支持Gigi出席嘅公開活動外,又會介紹其廣告或週邊商品,仲會訪問「Gi炎粉」,最勁就當然係近日Gigi現身支持其新歌《真話的清高》MV登上戶外大螢幕時,不但獲「明Gi台」野生捕獲,更趁機接受專訪,大談登上螢幕嘅感受:「確實好尷尬,但都開心嘅,冇諗過會出現喺咁大個螢幕上面。」
而昨日「Gi炎粉」於尖沙咀派發應援物品,又於巴士站落燈箱廣告,吸引過百粉絲排隊,「明Gi台」都有到場採訪,仲獲同樣到場採訪嘅無綫娛樂新聞台主播王鎮泉邀請受訪,坦言為咗Gigi特意學習拍片及剪片,並在拍片過程被唔少「Gi炎粉」感動。及後,佢哋更趁機「反採訪」王鎮泉,問到會否排隊拎應援品,王鎮泉就笑指:「我會呀!但我見已經過咗2、3百人排隊,唔知仲趕唔趕得切。」