化身咖喱仔！陳卓賢大晒Logo Shot神技

ViuTV早前大搞節目巡禮大晒冷，當中以男團MIRROR兩大人氣王姜濤與陳卓賢（Ian）孭飛嘅籃球偶像劇《季前賽》最備受期待，雖然正劇暫時未有得睇，不過呢日Ian就喺社交網晒出拍預告片時嘅花絮片段，趁機大騷精湛球技。身為籃球好手嘅佢，三分波、上籃當然難佢唔到，佢仲表演埋先用指尖轉波，然後再表演轉身射波，相當犀利。

不過最勁嘅，就係佢化身NBA球星「咖喱仔」史堤芬居里，企喺中場位置表演「Logo Shot」，射入超遠三分波，認真嘆為觀止！但幾位MIRROR嘅兄弟似乎唔抵得佢咁招積，紛紛留言寸爆，Anson Kong表示：「如果喺維港射個波過去都入，咁我就話你勁」，Alton（王智德）則指：「我依家喺黃大仙掉個波畀你，我想睇吓你接唔接得住。」