李亞鵬竇靖童世紀同場　王菲李嫣冇影！

內地男星李亞鵬同天后王菲離婚後，佢事業當然麻麻，感情生活當然受關注，早排被爆同細佢19歲嘅女友海哈金喜拍拖，但兩個放閃後冇耐，就冇聲冇氣，即刻惹人懷疑分咗手。不過日前李亞鵬着到西裝骨骨，以嫣然天使兒童醫院發起人嘅身份現身喺北京舉行嘅慈善晚宴時，就畀人見到佢同海哈金喜低調同場，原來佢哋真係未分手。

另一個焦點，唔係關心李亞鵬係咪愛情事業雙失意，而係佢身邊出現咗「王菲2.0」，嗰位就係王菲嘅大女竇靖童，一向鍾意中性打扮嘅童童，當晚着套型格嘅黑衫再襯皮手套，真係好有佢阿媽王菲嘅影子。而呢對繼父女，雖然都有一段時間冇公開同場出現，但一齊行紅氈同喺海報上簽名時，相當合拍又自然，明顯佢哋冇因為王菲嘅關係而生疏咗，睇得出佢哋感情仲好好。李亞鵬喺現場仲為繼女童童帶路兼一齊影合照，不過就有網民問，同樣身為嫣然基金發起人嘅王菲，仲有佢哋所生嘅囡囡李嫣做乜唔嚟，否則「一家四口」就可以世紀同框，幫個晚宴起宣傳作用。