锺嘉欣新歌获激赞　原来系第14首唱作包办

有“嘉欣BB”之称嘅艺人锺嘉欣去年回港拍摄无綫台庆剧《星空下的仁医》，收放自如嘅演技，大有机会问鼎今年视后。依家已经返温哥华同老公、一对仔女共聚天伦嘅佢，未能返港为新剧宣传，亦都唔知佢几时再返港拍剧，所以最近就有传《星》剧系佢息影之作。<br/><br/>“嘉欣BB”嘅粉丝唔使伤心住，因为佢接受访问时就话：“我冇讲过退出娱乐圈喎，之前系话过想留多啲时间陪老公同仔女，但如果有好嘅剧本同合适嘅角色，我都会尝试去拍嘅。”佢话唔会息影，啲粉丝梗系开心啦，不过如果想多啲支持吓佢，可以捧佢嘅新剧之馀，不妨睇吓佢首剧集歌《好好珍惜自己》MV。<br/><br/>呢首歌除咗系佢唱外，仲系佢自己作曲嘅，真系多才多艺，其实呢首《好》系佢第14首亲自作曲嘅作品，而对上嗰次就系4年前，为咗向佢对仔女表达无条件母爱嘅《做你的晨曦》，嗰次佢仲自己填埋词添。<br/><br/>啲粉丝话睇到佢喺新MV中个靓样，同埋揽住个妹妹唱啲好正能量嘅歌，个个大叫回忆番晒嚟，话自己真系由细听到嘉欣BB啲歌大，有啲又话听住首歌，就会感受到很多爱同温暖，既然佢啲歌咁有打动人心，“嘉欣BB”要拍多剧之馀，仲要作多几首歌，慰借吓粉丝心灵先得喇！<br/><br/>