贏在起跑線︱安以軒愛女1歲生日　速袋逾10卡鑽戒

台灣女星安以軒婚後為老公誕下一仔一女，早前佢就自爆老公錫到佢燶，就嚟買晒某間珠寶名牌全部Product畀佢，言語間幸福滿瀉，估唔到原來阿女「娃寶」近日1歲生日，老公「再接再厲」，喺澳門豪搞大型生日P，對前世情人更加係大手筆，豪送10.22卡心型裸鑽畀阿女，估計要價上億新台幣（約2,781萬港幣）。

安以軒當年結婚鑽戒主石約10.57卡，意指「十分完美我妻」，本身安以軒今次想送囡囡小蝴蝶結戒指，結果老公認為「要給我寶貝女兒最好的」，於是送出10.22卡心形裸鑽，搞到安以軒呷晒醋，仲落Order叫老公未來17年都唔可以再送生日禮物畀個女，又話依家囡囡太細個，呢粒裸鑽就畀媽咪戴住先，等阿女18歲先物歸原主。

而今次生日P，安以軒為整個家族製作「66」、「娃寶」專屬Tee共20件，「娃寶」屬老鼠，又擁有專門設計嘅私人訂製圖案，加上所有參加嘅賓客喺酒店都有尊榮享受，可以享受修甲、採耳等服務，小朋友又任玩電子遊戲，囡囡娃寶亦喺眾人見證下完成抓周儀式。