原本只係簽姜濤？MIRROR身世之謎大揭秘

人氣男團MIRROR紅到發紫，不過近日ViuTV高層魯庭暉就大爆原來當初並無打算組成MIRROR，親自拆解其「身世」之謎！魯庭暉日前出席講座解構MIRROR現象，其中有人問到為何於節目《全民造星》後，會揀選呢12子組成MIRROR時，佢就坦言其實本來冇諗過要搞男團，只係打算好似其他選秀節目一樣，只簽冠軍亦即姜濤，但節目做到尾聲時，一班參賽者嘅表現成功打動咗製作組，每個工作人員都有自己心水，覺得放棄咗某啲有潛力嘅新人好可惜，最後公司聽取員工意見，為咗保留更多人才，先決定搞男團。

佢續指挑選隊員嘅準則係考慮到藝人嘅性格、待人處事態度及觀眾回響等，更透露之所以由Lokman擔任隊長，全因佢晚晚留低教其他戰友跳舞，其無私性格相當適合做隊長。