神還原「案發」經過！劉穎鏇拍片力證冇P圖

無綫小花劉穎鏇（Tiffany）日前出席節目巡禮時，以一條貼身露腰裙示人，更拍下不少靚相上社交網，但卻惹來P圖疑雲，指她上載的相片身形不合比例。而現時正為新劇《隱形戰隊》開工的她，就獲監製文偉鴻親自為她拍片放上社交平台，展示至真、至美身段，澄清絕冇P圖。

拍片時，監製就如記者般問Tiffany：「有報道話網民話你張相P到變晒形喎！依有咩回應呢？」Tiffany就笑言：「首次張相真係冇P圖，同埋我想同所有女士話，角度問題真係好重要。」之後她就開始側身少許背向鏡頭說：「嗰日我條裙露背啦！大家好想影我背脊，所以我就咁樣擺呢個POSE，（咁跟住你自己影嗰張係點㗎呢？）當然自己就花多啲時間，想騷吓條腰，側面去影，係咪好大分別呢？真係冇P圖㗎！」有片有真相，真係唔同角度、分別好大喎！

而監製更力撐Tiffany，留言謂：「其實我套戲個個都好勤力做Gym，為嘅係希望有最完美嘅演出，唔係淨係為咗貪靚，而真係好需要體能去應付好多動作場面，所以大家畀多啲鼓勵啦！」