Mandy終於「回家」！被大小姐篤魂精夠經典

藝人謝芷倫（Jan）憑處境劇《愛．回家之開心速遞》飾演大小姐秘書「Mandy」一角人氣急升，但前年就突然與劇中男友「博士」馬貫東齊齊離開劇組，就連去年馬貫東曾回歸客串，Jan都一樣無影，令唔少網民直呼不捨，時至今日都不時希望佢「回家」，「Mandy」更成為網民票選最想「回家」角色嘅第一位，而時隔兩年多，千呼萬喚終歸來，Jan終於重返《愛》劇，強勢回歸！

今晚（28日）播出一集講到「Mandy」讀完書回港，仲同新任大小姐秘書「無知May」趙希洛爭Job，網民相當期待。而Jan亦率先於社交網晒出靚相，見佢除咗同「大小姐」林淑敏、「KC」歐瑞偉、「熊若水」呂慧儀等人合照外，仲重演被「大小姐」篤魂精嘅經典畫面，真係咩回憶都返晒嚟！