林夏薇唔諗生B住　衝事業好過

藝人林夏薇以「愛眼之星」身分出席世界視覺日活動，講到她之前做矯視手術前接受檢查，發現右眼視網膜退化，故先做激光手術修補視網膜，之後再做矯視手術，她表示眼睛現已康復，坦言當初一知道視網膜出現問題好驚：「冇諗過會有呢個問題，視網膜可大可小，我冇任何症狀，所以大家真係要定期檢查眼睛。」講到以後不用再戴眼鏡，很難再化身「眼鏡娘」？她笑言：「都可以嘅，嚟緊都會開套關於法律題材嘅新劇，有諗過有啲造型需要眼鏡，可以戴平光眼鏡。」

她又透露為了拍劇，聖誕及新年應要在工作中度過，問到豈不是未能陪老公？她笑言：「好多年都係要做嘢，節日做嘢好開心，平時都可以同老公食飯，佢都好理解我嘅工作。」她又表示現時有工作就會接，最緊要時間就到：「之前都講過想盡量配合家庭。（指『造人』？）唔係，嗰個唔諗住，始終工作要緊。」而問到她可有信心憑《七公主》或《逆天奇案》奪視后？她坦言：「作為演員要演好每個角色，如果有機會會爭取，多謝觀眾支持角色，其他隨緣。」