袁和平嘆香港動作演員出現斷層：好難搵到新人！

著名動作導演袁和平（八爺）與導演蕭惠雄，今午（28日）以嘉賓身份現身浸會大學，與電影系學生作分享。八爺慨嘆香港動作演員出現斷層，擔心後繼無人，他説：「依家香港後生冇乜人學功夫，好難搵到新人，要去內地或外國搵，因為佢哋對功夫仍然有興趣，而且要培訓都唔係易事，除咗學功夫同動作，仲要睇埋外形，有冇觀眾緣。（自己有冇收徒弟？）冇，都有好多人叫我開學校，用得自己個名就想要負責任自己教，未必有咁多時間打理。」提到現今教小朋友不能以體罰，他笑稱：「我從來冇打過人，我就畀人打，哈哈！年代唔同，嗰陣師傅係嚴啲，但嚴真係好啲，打得多你會驚，一定會學好，出嚟啲人真係fit嘅。」

蕭惠雄則透露正與八爺籌備成立「動作實驗室」電影公司，他說：「希望做到承傳，會同大學合作，教授埋利用現代化技術，去培育新一代電影人，都仲研究緊，亦考慮緊同邵氏合作，因為佢哋有新嘅studio，不過未決定。」問到收生目標及是否由小朋友開始習武會較好，八爺指不一定：「20、30歲學都可以嘅。」