阿媽胎教！洪嘉豪被封港版木村拓哉有原因

有「港版木村」之稱的歌手洪嘉豪（Kaho），為「黃Viu煲劇平台」的《同煲同BLOW》任嘉賓，與主持人麻利齊齊討論日劇話題，提到「日劇天王」木村拓哉多部大熱作品，Kaho即席「神還原」木村在《悠長假期》玩彈彈波的經典場面，自言本身亦是木村迷，主因是受媽媽胎教影響：「我媽咪係木村迷，佗住我嗰時成日睇木村嘅劇，我覺得有少少胎教影響，有科學根據講過DNA係識得學習，所以似樣都可能係有啲關係。」

對於被封「港版木村」，他坦言受不起這個稱號，但另一邊廂又會心裏暗爽：「木村喎，真係受唔起！有時自己都覺得係有少少相似，但我唔會認㗎嘛，不過係好開心，佢咁靚仔。」近期Kaho再有新花名，由日本男神變身為大埔許願樹「林村拓哉」：「事緣有人睇完我MV，喺討論區留言話我好似木村，但佢打錯字做『林村』，有人回覆佢林村喺大埔喎，之後有粉絲改圖喇。」