林峯演癡情男抽離唔到角色　萬梓良上身狂咆哮

藝人林峯近年主攻內地發展，出產唔少劇集及綜藝節目，工作接唔停。現時已有4套劇揸手，其中一套《星辰大海》近日官宣將於聽日（30日）正式播出，林峯上載預告片谷劇，扮演癡情男嘅佢非常投入角色，留言話：「簡愛你不可能離開我的，我會一直纏着你！」

故事講林峯飾演金融才俊，遇上來自家境貧困小村莊嘅「簡愛」劉濤，展開辦公室戀愛，佢對劉濤死纏難打。其中一幕對住女主角劉濤失控咆哮，激動到青筋爆現，七情上面，以另類演技詮釋恐怖情人！有網友話萬梓良上身，大讚其「咆哮式」演技精湛，昇華到另一層次。