素顏驚現大黑眼圈！傅穎化妝秒變女神惹網民震驚

「餅碎」傅穎（Theresa）近年都係主力喺內地發展，入行以嚟不時被指樣貌再進化嘅佢，一直都強調自己冇整容，只係靠化妝同影相角度配合，令自己變得更加靚喎！經常活躍喺社交網嘅佢呢次素顏上陣拍片，同網民分享神級化妝技巧，教大家點「易容」！

喺片中睇到素顏上陣嘅佢勁大個黑眼圈，塊面仲好似有兩截色添！雖然望落個情況咁嚴重，但係自認係易容大師嘅佢都未驚過，佢話：「喺化妝嘅路上總會喺度摸索。做演員之後，因扮演唔同嘅角色，就會有唔同嘅取捨。」

之後佢就拎起化妝掃教大家化妝，佢話用橙色嘅妝容會令人感覺自然啲，所以佢喺眼皮部分搽橙色眼影，再用最深色嘅啡色畫長眼線，因為拉長眼線可以改變面形，仲要貼上雙眼皮膠紙，同埋要用畫長條眉等！經過一輪化妝之後，見佢話咁易就秒變女神，唔少網友都話好震驚，大讚佢真係識易容術，有男網友就話：「以後都唔敢幻想女仔落妝個樣」，驚會嚇親自己囉！