馬國明出招嚇走「院長」　鍾嘉欣亂噏對白笑爆嘴

無綫台慶劇《星空下的仁醫》好評如潮，劇中兒科病房溫馨場面不斷，戲外一班演員亦同小朋友打成一片，拍攝現場氣氛融洽。雖然早前鄭嘉穎被鍾嘉欣踢爆係全場最惡，不過劇組公開拍攝花絮片段中，小朋友最怕嘅其實另有其人，竟然係出名好好先生嘅馬國明！

片中見鄭嘉穎帶住小演員「院長」黃芷晴周圍走，仲叫佢搵馬國明一齊玩：「好好玩㗎馬國明哥哥，佢點玩都得㗎！你試吓啦，好好玩㗎佢！」但由於馬國明於劇中形象嚴肅，加上「天然呆」零表情，令「院長」唔敢埋身，之後馬國明仲出口術：「我好危險㗎，小朋友千祈唔好過嚟！」嚇到小演員急急腳走開，場面搞笑。不過「院長」最後都鼓起勇氣問馬國明問題，而馬國明都有問必答，氹到「院長」笑晒口。

而因一場喊戲獲得激讚嘅鍾嘉欣，戲外其實係開心果，經常笑料百出，除不時講錯對白索性亂噏搞氣氛外，仲成日擺烏龍，其中一幕喺手術室情緒失控離場，本來忍住眼淚勁入戲，點知就行錯方向，兜個大圈先行得出手術室，蝦碌表現即時令全場爆笑，連拍檔鄭嘉穎都冇眼睇！