郭富城係野獸？方媛扮「貝兒」連天王都要紆尊降貴

天王郭富城（城城）同老婆方媛拍拖到結婚，就算生咗兩個女都依然恩愛，擁有一顆少女心嘅方媛更製造驚喜，難怪城城錫到佢燶！尋日（31號）係萬聖節，向來着重儀式感嘅方媛當然唔會錯過打扮嘅機會，佢化身《美女與野獸》嘅「美女」貝兒，着上黃色公主裙、頭綁黃色絲帶，更戴上蝴蝶結bling bling耳環，造型一絲不苟，更應節化上萬聖節眼妝，「鬼」火咁靚！

着上西裝嘅城城官仔骨骨，非常配合老婆公主身份，彎腰將老婆隻手放到頭前，畫面十足公主同王子一樣，唔少網民大呼羨慕呢位「天王嫂」咁幸福。不過，唔知點解方媛晒完恩愛又將貼文刪除，唔知係咪本身諗住擺小號，卻放錯帳號呢？