教主弱點大公開！Anson Lo最冧神徒講呢啲…

MIRROR人氣王Anson Lo（盧瀚霆）近日亮相網紅加蔥嘅影片頻道，大玩快問快答，出名怕魚嘅佢，竟自爆原來仲有另外一大弱點：「其實我好驚唧，我記得我好細個去旅行，大家住埋同一間酒店，我阿爸阿媽會捉住我係咁唧我。」又笑言曾收過鹹魚做生日禮物：「魚就冇收過，但有收過鹹魚，不過最好都唔好啦，因為鹹魚都有個頭架嘛，我見到會好不安。」

而向來備受「神徒」愛戴嘅佢，就感恩每日都能夠透過社交網收到粉絲示愛講「我愛你」，又會以「一起走下去」互相鼓勵同扶持，令佢大感窩心。至於早前騷肌引起哄動嘅佢，被問到會唔會出寫真集，佢就表示的確曾有構思：「其實半年前我係有諗過嘅，但因為平時好多工作都有好多類似寫真嘅相，所以本身都好多機會畀Fans同觀眾睇到鏡頭下唔同一面嘅我，所以就打消咗呢個念頭。」