走過低谷︱彭皓鋒成內地劇「御用壞人」人工10級跳

前無綫藝人彭皓鋒未受疫情影響，過去10個月拍了10部內地網絡大電影（網大），並成為大陸劇「御用壞人」，人工更不止10級跳。他稱感謝監製梅小青與劉家豪，助他開拓內地巿場，而歌手黑妹更幫他渡過經濟難關。

皓鋒自2012年約滿無綫後，毅然向外闖，可惜新簽的電視台未能取得牌照，又被大減3分2人工，他遂決定不簽公司，令人生陷低谷：「當時第3個小朋友剛出世，冇咗份工又冇積蓄，如果身邊唔係有朋友鼓勵我，諗歪少少個人真係癡線。」

當年他為生計而不停Cold Call內行人，希望對方有工作介紹他，幸獲黑妹仗義相助：「我本身唔識佢，佢真係好偉大。佢搵我去唱歌，將自己演出酬金分畀我，當時冇佢，真係過唔到活。」捱過3個月後迎來曙光，梅小青找他到內地拍劇：「第1次拍大陸劇，我係零普通話，因為對手唔識聽廣東話，畀唔到反應，於是我就周圍問人普通話對白點講，啲人覺得我好勤力，所以好多人介紹我去拍劇，跟住就冇停過拍大陸劇。」