張晉請「細仔」高瀚宇食飯　蔡少芬煮到成枱餸

藝人蔡少芬同老公張晉係圈中模範夫妻，張晉之前喺內地真人騷《披荊斬棘的哥哥》，同內地男星高瀚宇及內地歌手白舉綱一組，從而建立咗深厚嘅友情。佢哋不但係最佳戰友，仲係「父子兵」，因張晉直頭當咗佢哋係兒子一樣看待，生活上照顧佢哋，喺《披》中畀咗佢哋好多專業意見，而佢哋演繹歌曲《MMA》，加入咗武術打鬥元素，令人深刻印象！

日前「細仔」高瀚宇去咗張晉上海嘅屋企食飯，但係「大仔」白舉綱就冇去到，張晉留言：「高瀚宇來家吃飯，滿足了弟弟妹妹看現場版的《MMA》，白舉綱你太忙沒來，但好像又來了。#爆美好的生活#」佢仲將白舉綱個樣，P落去佢同高瀚宇嘅合照度，望落一啲違和感都冇。而高瀚宇好親切咁稱呼蔡少芬做「芬媽」，蔡少芬當然都唔會待薄高瀚宇，佢大晒賢淑嘅一面，親自落廚，煮咗成枱都係餸，望落去色香味俱全，睇見都想食呀！