謝安琪解放D奶晒半呎事業線　明「線」MIRROR

「2021年度叱咤樂壇流行榜頒獎典禮」今日（8日）於昂坪市集舉行記招，歌手張敬軒、謝安琪（Kay）、MIRROR、ERROR、胡鴻鈞（Hubert）、陳柏宇、許廷鏗（Alfred）、泳兒、鄭欣宜、ANSONBEAN、Dear Jane、MC（張天賦）等出席。今屆頒獎禮頒發合共49個獎項，比去年的43個，多出6個獎，並會將「叱咤樂壇生力軍」的金、銀、銅3個獎，分拆成9個，變為男、女歌手及組合，各有金、銀、銅獎3個獎。

論全場焦點，最「凸」出的當然是以超Deep V上陣的Kay，激罕晒出久違多時的事業線。一係唔做，要做就去到盡，Kay今次明顯「晒你冷」，勁騷長達半呎的事業線，D Cup「湯碗胸」「胸猛」壓陣，令本來有大批粉絲在現場助威的MIRROR失色不少，明「線」小鮮肉MIRROR一鑊！

問到來勢「胸洶」的Kay，是否想再奪叱咤女歌手金獎？Kay否認並笑說：「今日太凍啦，所以要hot啲。」她說一身性感裝扮，由造型師配搭，事前她也有給老公張繼聰過目。問到阿聰有何反應？她笑說：「佢冇乜反應，佢睇慣咗自己個胸size，佢再大啲，不過佢都有話天氣涼涼哋，其實我個樽領薄紗，係護住喉嚨嘅。（係咪佢覺得你身材好唔怕騷？）唔關事，佢好熱衷時裝，最緊要靚。」

她還打趣指家中只得她一個女歌手，老公當然支持她。問到阿聰是否支持她攞女歌手金獎？她說：「佢乜都支持，不過我冇乜諗啲獎，自己成立咗自己工作室之後，過程已好滿足，有好好嘅成果，冇再諗有啲咩獎，重點已經唔係呢方面。」她續說作為投資者及製作人，在做音樂方面有更大空間，在過程上得到更大滿足感，已經是好好禮物，她說：「好多謝我個團隊，幾個月嚟為我咁搏命。」講到新歌幾乎由她自己包辦曲詞編監唱五職，是否想奪得幕後獎項，來個大滿貫？她笑說：「我喺創作人方面係BB級數，有得參與已經好開心，目標唔係特別為獎嘅，不過『大滿貫』個名，聽落好似好叻好新穎，等我返去再諗諗。」

Kay雖然盡領「峰」騷，其他女歌手也有睇頭，泳兒玩晒長腿，林欣彤玩露腰，白滑「肚仔」一樣吸睛，至於關心妍也晒事業線線頭。另外，現場有過千名男團MIRROR的粉絲「鏡粉」在場，不時大叫偶像名，場面墟冚！有Fans早於昨晚（7日）已到場，冒住氣溫只有11度兼下大雨，通宵守候霸靚位，據知附近的青年旅舍的客房全部訂滿，可見「鏡粉」為見偶像一面出盡辦法！