呻MIRROR阻住拎組合獎　193：快啲賺夠退休

藝人193@ERROR、鄭伊琪、譚凱倫及郭奕芯，下午（9日）為ViuTV清談節目《晚吹-戀講嘢》錄影，193表示希望節目能長做長有：「預計26集，今日已經第18集，希望反應好變長壽節目，咁我就可以keep住一個禮拜曝一次光。」他指自《ERROR自肥企画》後已很久未有自己節目，笑稱與其他ERROR成員為「ViuTV洪天明」，他説：「依家4個經常都係客串之嘛，一年都唔知有冇一個自己節目，不過唔係投訴公司。（唱歌方面呢？）很嗰一首半歌，如果係起勢做十首八首都仲可以衝吓新人獎。（咁冇信心？）你當Edan（@MIRROR）、MC（張天賦）、阿Mike（曾比特）嗰啲流㗎？（咁你睇好邊個？）當然希望一齊出嚟嘅兄弟Edan攞啦。」問到對ERROR爭組合獎信心，他說：「希望MIRROR快啲賺夠退休，讓個位畀我哋，如果唔係都唔使旨意攞金獎。」

他又笑指預計去頒獎禮如牛郎般「陪坐」：「預咗坐成晚，惟有飲多幾杯咖啡提神，希望爭取到咖啡廣告就可以贊助我哋飲成晚。（咁冇信心？）其實我哋有計過數入唔入到最喜愛5強嘅，舊年計應該係排等6，我哋會睇吓Dear Jane有冇出歌，如果冇我哋就有機會攞組合獎頭5名。」

另外，提到他參加《造星4》的妹妹郭嘉盈，他指未公布不便透露她成績：「佢應該都冇嘢做㗎啦，出身自我呢個家族嘅都唔係多才多藝，公司除咗我都唔會再簽多個咁嘅人，如果隔離台想簽佢可以聯絡我，哈哈！」另他透露將會兄妹檔拍廣告。