Server死晒︱個唱飛極速售罄　張敬軒出Post感激歌迷

張敬軒喺12月舉行嘅跨年紅館演唱會《Hins Live in Hong Kong The Next 20張敬軒演唱會》，今日（9日）正式公開發售，依家佢喺樂壇嘅走勢咁強勁，啲金曲又多又好聽，個Main Point係可以同軒仔佢一齊過平安夜、聖誕節、除夕同新年喎，梗係好多人爭住去啦，所以今朝一開賣咋，佢班「軒迷」就喺個訂票網頁度狂撳掣掃飛，就係因為太多人「風冚」咁湧入售票網，造成網絡大塞車，個Server Down完一次又一次，終於喺數小時內，15場個唱門票全部售罄，被「軒迷」搶到一票不留。

軒仔睇到「軒迷」留言話同佢一樣咬住塊麵包去撳飛，有啲網民又話單手爬山仲易過買佢啲個唱飛，最多網民係話買唔到飛，要熱烈哋要求佢再加場，佢就係知啲「軒迷」撳飛撳到手指出血咁滯，所以喺社交出PO衷心多謝支持佢哋粉絲：「多謝各位支持今日嘅公開發售，千言萬語盡付台上每一分鐘點心紅館見！」