騷肩被嫌唔夠喉！林穎彤Bra Top晒線頭冧網民

無綫小花林穎彤（Bella）嘅媽咪被爆有「叫鴨」癖好後，據聞佢情緒大受影響，不過心情幾Down都好，生活依然要繼續，所以一定咬緊牙關度難關。日前佢除咗喺社交網上載預告片，宣傳佢有份拍攝嘅無綫新劇《十月初五的月光》外，錄影完綜藝節目《思家大戰》，就算收工時天都黑齊，佢一樣向粉絲派福利，先挨住條欄杆，除咗一半外套玩露膊，加埋佢呢吓回眸一笑，真係想電死人咩？

騷得香肩咁少，梗係滿足唔到網民啦，所以之後佢索性徹底啲，坐喺條樓梯度再除埋件外套，露出個白色Bra Top晒線頭冧網民，佢似乎自勉話：「#若遇到災難危險願留下最壯麗瘡疤，#剩低我仍然偏執的相信光可撫慰懼怕。」結果有成過百留言不停為佢打氣，叫佢加油。相信佢睇到啲咁窩心嘅說話，一定可以挺起胸膛，走出佢人生嗰條好似身處嘅黑麻麻樓梯咁，再好似下一張相咁，逐步邁向有街燈嘅光明前路。