小S凌晨失眠被網友問到口啞啞：係咪更年期？

台灣藝人徐熙娣（小S）自傳出即將復工之後，佢就繼續亂玩社交網，早兩日佢就自爆自己5日冇洗頭，點知今日（16日）凌晨佢仲上載咗一張文字圖，指自己失眠兼搵唔到人傾偈，唔少網友見到都即刻留言過幾招畀佢，當中就有人問佢做咩唔搵好友、台灣名主持蔡康永，小S就爆料指：「他竟然不接我電話！斷交！」

當中亦有唔少網友問佢做咩唔搵老公Mike（許雅鈞）？小S稱對方已經瞓到好冧：「自己明白睡覺睡得香甜感覺有多棒，所以自然不會吵醒他。」點知就有網友續問，佢失眠分分鐘同更年期有關，嚇到小S急急否認：「現在月經還會來快10天！」