胡鴻鈞自認同張智霖冇得比:我都有自知之明

2021年11月17日 19:01
東網電視
更多新聞短片
藝人胡鴻鈞(Hubert)、何依婷等人於將軍澳電視城出席《十月初五的月光》宣傳活動,其中兩人聯同羅天宇一同表演合唱主題曲《祝君好》。而今日正值海俊傑生日,石修亦將生日,故台上為他們驚喜慶生。講到劇集即將出街,依婷表示:「好開心,台前幕後付出咗好多,自己都好期待。(首次擔正做女主角,仲要台慶劇會緊張?)開心多過緊張,希望大家會鍾意。」問到可擔心外界將他們與舊版本比較?她坦言:「我冇諗咁多,如果要比較都冇辦法阻止,但呢個係20年後再拍,劇情都有唔同,希望將經典帶畀年輕一代可以睇到。」
Hubert就不怕比較:「因為大家已經比較緊,我都覺得理所當然,呢個係經典劇集,但戥依婷開心,大家讚佢外表甜美,但對我就好壞參半,話同張智霖冇得比,我自己都覺嘅。(唔開心?)冇呀,我都有自知之明,不過希望大家感受到自己都花心機、時間演繹,畀角色新生命。(監製讚你冇比下去?)估唔到監製會咁讚我,拍嗰陣其實佢好少讚我,可能佢想我保持謙虛嘅心態,好開心佢畀我正面評論,希望唔會令佢失望,知佢當初選角都有壓力。」
講到依婷繼《星空下的仁醫》後,連續兩套劇出街,她就表示兩個角色性格不同,一個溫柔、一個任性。問到可有信心衝擊視后?她坦言:「呢個好遙遠,冇諗咁多,希望可以睇番自己有咩進步嘅地方,我就睇好李佳芯或者林夏薇。」Hubert亦分享經歷:「當年我《降魔的》係戲份重嘅角色,又係台慶劇,都冇諗咁多,點知效果幾好,多咗人認識我。(你有冇想衝擊視帝?)我話要衝擊視后㗎嘛,哈哈。」依婷即改口謂今年睇好Hubert攞視后,笑言讓他攞視后,隨後Hubert正經坦言:「對於影視獎項我抱參加party嘅心態。」