苗僑偉細仔︱曾底褲笠頭　28歲苗晉孖索女友放閃

型佬苗僑偉同老婆戚美珍育有長女苗彤（Phoebe）及幼子苗晉（Murphy），日前苗晉28歲生日，老竇苗僑偉就喺社交網晒相祝賀，仲晒出阿仔細細個影落嘅Cutie西裝Look，樣貌同依家大個仔都冇乜分別，細個時仲多幾分得戚Feel。苗僑偉又晒出兩父子打Golf相，搞到網友對平時低調嘅苗晉好有興趣。

大家都知苗彤外形索爆，又係專業攝影師，亦有豐富幕前演出經驗，細佬苗晉自然不遑多讓，大學畢業後就任平面設計師，舊年更親自上陣影埋半裸內褲寫真，僅穿三角底底嘅佢仲玩埋化妝，造型大膽又有型，似足專業模特兒。苗晉亦有個富二代女友Jasmine，對方亦係一位花藝設計師，二人拍拖6年，成日孖住出去玩，又高調放閃，但苗晉對家庭事就相當低調，罕有晒出同明星老竇嘅合照，似乎都唔想張揚自己係星二代嘅身份。