陳法拉攬囡囡睇《尚氣》　畫面溫馨滿載母愛

轉戰荷里活發展嘅女星陳法拉，早前於首部華人超級英雄電影《尚氣與十環幫傳奇》（Shang-Chi and the Legend of the Ten Rings）中飾演「尚氣媽」一角，大獲好評。雖然勇於向演藝事業發展，但佢未有忽略家庭，今年2月突然宣布為法籍老公Emmanuel Straschnov誕下囡囡，將家庭、事業兩兼顧得妥妥當當嘅佢，一有時間就會陪囡囡享受親子樂。

今日（22號）法拉上載兩母女一齊欣賞自己作品《尚氣》嘅相片，雖然只得背面，但見法拉將頭挨近囡囡嘅頭仔，已感受到滿滿嘅愛，畫面非常溫馨。唔少圈中好友畀Like讚好，同樣已為人母、定居加拿大嘅鍾嘉欣留言：「珍貴的時刻。」而王君馨則留言問：「電視已經有得睇？」呢套戲早前Hit爆全爆，打鐵趁熱，梗係火速上架食住個勢啦！