冷鋒到~烤肉粵菜有優惠

2021年11月22日 20:00
東網電視
更多新聞短片
點會估到冷鋒到都有飲食優惠呢?係,有人氣羊烤肉主題店就噱頭十足推出「冷鋒限定」優惠,加上食羊,即時暖胃又暖身,而另一間酒店中菜廳不約而同玩噱頭,推出粵菜放題,當中有冬日暖胃之選的迷你荔芋油鴨煲,前提係,放題任食,加上多款菜式即點即煮食到飽,寒風中送暖!
羊肉控烤肉迷搶試
去過北海道旅行嘅,對當地人氣嘅成吉思汗烤肉絕不陌生,作為以羊肉為主角嘅烤肉,係冬日驅寒補虛首選,而位於銅鑼灣嘅人氣羊烤肉主題食店「燒肉酒場」就由今日起至11月30日期間,推出「冷鋒限定」優惠,只要巴絲打下單前出示當日(任何時間)天文台顯示氣溫低於攝氏20度嘅屏幕截圖相片,即享當日全場全日所有羊食即加碼增量50%(包括午市及晚市)。餐廳選用新西蘭同蒙古入口嘅新鮮羊肉,兩地羊肉品質都以軟嫩多汁為賣點,當中有罕見嘅新西蘭羊軟骨、新西蘭連骨羊腿、蒙古羊架、蒙古羊油卷等,又有新鮮黑草羊內臟,如羊肺,羊心,羊肚和羊肝,自問係羊肉控嘅話千祈咪錯過喇!
食肉獸粵菜控擦餐飽
位於汀九嘅帝景酒店麗都軒自重新裝修以來,搞作多多,先有高質嘅午市點心放題,再有即日至2022年1月28日推出嘅「珍饈‧粵饌 120分鐘晚市粵菜放題」,由中菜總廚劉耀強師傅率領其團隊帶來逾30款粵菜及甜品,有鎮江肴肉、椒鹽三文魚頭腩、糖醋小排骨等。冷鋒到,當然不少得巧手肉肉菜式及暖身菜,好似迷你荔芋油鴨煲、荷香花雕滷和牛肋條、菠蘿咕嚕肉等,放題任食,幾多兩煲荔芋油鴨煲,成身暖笠笠,再來多款甜入心美點如雪燕楊枝甘露、圓肉百合燉桃膠等滋補養顏甜品,絕對大滿足!餐廳更推出預訂優惠,於3天之前預訂並全數繳付,即享7折優惠,位位平百多元,抵!