入行18年終圓夢！陳家樂野生捕獲偶像周潤發

影帝周潤發於港九新界各區留下唔少「腳毛」，經常獲街坊野生捕獲，不過入行18年嘅藝人陳家樂，卻慨嘆一直未有機會遇上對方。直至昨日（22日）終於圓夢，能夠與偶像同框！陳家樂於社交網大晒與周潤發合照，並激動留言表示：「Omg！（我的天！）頭先偷食燒鵝嘅時候！後面突然有一班行山客叫嘢食，突然佢哋問：『發哥，想食咩？』聽完之後，我個腦即刻高速運轉！行山，發哥，行山，發哥，行山，發哥，我計算到，佢係賭神發哥嘅機會率，一定大過同花順！」

「我諗都唔諗，轉頭一望！果然！係偶像發哥！入行咁耐！我終於可以見到發哥啦！我即刻膽粗粗問發哥可唔可以影相，影完之後，佢仲見我鏡頭花咗，影到矇查查，再用佢電話同我影，再send番畀我，太貼心啦！」而早前中六合彩嘅陳家樂，笑言見到周潤發，比中獎更開心：「開心過中六合彩，媽我得咗啦！」