陪爸爸睇《星空下的仁醫》大結局　鄭嘉穎細仔入晒戲

無綫劇《星空下的仁醫》昨晚（22日）大結局，主角之一的鄭嘉穎坐定定在家欣賞，仲抱住最細仔鄭承亮（Yannick）一齊睇，齋睇相都覺得溫馨！見Yannick眼仔睩睩，好肉緊咁望實部電視機，會唔會覺得好好奇，點解爸爸會出現喺電視機入面呢？而鄭嘉穎就喺後面展現慈父的微笑，佢留言：「尋晚大結局，今朝已經有啲失落，唔知之後幾時先會再見到鬍鬚醫生呢？」

講番《星空下的仁醫》大結局先，之前令人喊死嘅劇情，今次大團圓結局，鄭嘉穎與鍾嘉欣有情人終成眷屬，兩人一齊去睇星星，鄭嘉穎趁機搭住鍾嘉欣膊頭，鍾嘉欣冇抗拒仲好sweet挨落去，唔知仲會唔會有續集呢？