白雲做「愛的鹹豬手」 為代蓮曦丹美遮胸

2021年11月23日 19:01
東網電視
更多新聞短片
前落選港姐代蓮曦丹美(Daisy)今日(23日)在尖沙咀舉行首飾發布會,邀請藝人白雲、歌手謝高晉、蔡頌思和鄧梓峰女兒鄧瓊芝等出席,嘉賓的服裝配飾均由Daisy打造,她揀了一襲低胸雪紡裙給白雲,令白雲谷出巨胸,但Daisy身上長裙則太鬆而露bra,白雲為免好友走光,出手為Daisy遮胸,擺到明做「鹹豬手」。
白雲透露與Daisy相識多年,對方是其服裝顧問,她說:「我平時唔係咁fashion,佢喺度我就fashion啲,不過身形唔同,我可以着佢啲衫,佢着唔到我啲衫。」透露2人有意合作做生意,希望做中國風時裝和首飾,對Daisy眼光甚有信心,預計明年籌備,最快後年落實,問會否擔心同閨蜜做生意會有拗撬?白雲說:「以前我同朋友搞過朱古力生意,結果3個朋友,唔見咗1個,好正常,10個朋友10個都話同朋友做生意會有拗撬,上次唔係淨係因為錢銀反目,乜都有啲,呢啲係緣分,緣分走咗,祝你下次好運喇!」
問到可能要搵多幾個朋友一起夾份,以免與Daisy傷感情?白雲相信不會與她因為錢銀反目:「朋友之間唔應該為錢,錢解決到就唔係問題,我好少同人有錢銀問題,可能我比較感性。」
Daisy讚白雲勤力、上進,又性感似仙女,對於白雲說2人不能交換衫着?她說:「我身材扁,佢有曲線,佢有肉哋,係好嘢嚟,我同佢係互相羨慕大家身材。」現場她即時將身上白色披肩給白雲披上,並說:「我嘅係佢,佢嘅係佢。」白雲即講笑:「錢都係。」Daisy表示未曾與人合作做生意,合作原則首要條件不能影響感情:「朋友行先,真心對待,錢銀擺最後。」