劉詩詩脾氣好出騷唔使保鏢 相機隊住塊面任人影

2021年11月25日 12:01
東網電視
更多新聞短片
慶祝完51歲生日嘅台灣男星吳奇隆被讚皮光肉滑,人人都奇怪點解歲月冇喺佢面上留下任何痕迹,其實原因好簡單,因為娶咗內地女星劉詩詩呢個老婆,詩詩唔止樣靚,仲出名好脾氣,老公唔使受日日受氣,真係眉頭都皺少啲啦。
日前詩詩出席活動時盡顯高情操嘅一面,當時佢同班工作人員同行,貴為內地知名女星嘅佢,唔介意冇特別通道畀佢自由行,亦都唔Mind身邊零保鏢,冇得凸顯佢高人一等嘅地位,仲選擇行人頭湧湧嘅街道,被粉絲近乎用手機近距離隊住佢塊面咁影相時,佢一樣都係一副「埋嚟睇、埋嚟影」嘅放開式態度,仲送埋甜美容又點話,親民到加零一,搞到佢啲粉絲不知幾開心。
早前詩詩曾被粉絲詐型,「投訴」佢結婚生仔後,演藝事業就疏忽晒,唔滿意佢冇咗事業心,但據詩詩身邊人爆料,話其實佢只係有自己想法,覺得唔同人生階段就要做唔同嘅嘢,好似早幾年囝囝「步步」仲細,佢先選擇留多時間畀家人,但家陣寶貝仔開始大,加上家中長輩又樂意幫佢湊仔,所以佢又開始重投幕前工作,而老公都好支持佢繼續拍戲,詩詩有屋企人支持佢家庭、事業兩邊兼顧,心情好,自然脾氣都好啦。