叱咤8強最資深 張敬軒:佢哋加埋就等如我年資!

2021年11月25日 19:27
東網電視
更多新聞短片
歌手張敬軒、周秀娜(Chrissie)和劉俊謙下午(25日)出席活動。早前被堪輿學家七仙羽於拍攝節目時稱呼作「張劍謙」的軒仔,被問到師傅有否「贈兩句」,他笑稱師傅會無定向風忽然贈言:「有日我同佢講,話覺得佢七師傅呢個朵好勁咁,叫佢幫我起個朵,佢就話你叫『Super J啦』,咁嗰日係喺柴灣,所以就叫『柴灣Super J』,簡稱『柴J』喎。(有冇問佢點解?)佢啲嘢冇得解㗎,唔知佢知唔知個J字係咩意思呢,哈哈。(講中咗?)承佢貴言啦,哈哈!」
軒仔指師傅要他多穿鮮色衣物及盡量使用新款物件:「話新一年成個人精神面貌會唔同啲,最緊要開心同花喱花碌咁,會令我個人開朗紓緩壓力,都有問佢有冇攞獎秘笈,佢叫我保持平常心就得。」他坦言今年是大競爭的一年,但也算是豐收的:「因為成個市場大家都好活躍,其實係一個動力,尤其對我呢啲有一定年資嘅人,會刺激你要諗啲新嘢,唔好咁懶,自己都要撻番着副偈。」
成功打入叱咤《我最喜愛的男歌手》8強的他説:「個遊戲係好玩嘅,要畀心機玩嘅。(最資深係你?)有網友留言其他入圍歌手嘅出道年資,加埋就等如我年資,哈哈!一個頒獎禮其實有唔同年齡同年資嘅人喺度先健康嘅。」他表示近日會不停拉票,又感謝粉絲支持,不論最終誰人獲獎也會替對方高興:「參與咗、努力過,邊個攞都開心,每一個付出咗嘅人都應該有回報。」
近年拍劇不時受傷,更獲封「容易受傷的女人」稱號的Chrissie,昨晚(24日)於社交平台放出一張影住雙腳的照片並留言:「膝頭哥痛到路都行唔到,即刻急Call醫生。」她交代因練習而觸傷舊患:「12月要拍兩套電視劇,其中一套有好多動作戲,想趁有時間早啲搵武指練好動作先,唔想臨場先記動作會做得好生硬,但又整親左腳,其實係舊患嚟,好多年前拍戲整親韌帶,但冇畀時間抖,唔想阻進度。」
她指自此後每次拍戲都一定會受傷:「試過拍追逐戲要突然叫停,左腳因傷冇力就失平衡,膝頭直接跪地痛到起唔到身,最好笑連拍文戲都會出事,之前喺澳門拍愛情片,我角色每日都要跑樓梯,結果又整親。」她笑稱自己多年受傷經驗,已儲下大批醫生名單,有事可即時求救,另家中也有大量運動繃帶等:「不過女演員慘啲,有時啲衫遮唔到就冇得用,所以要食多啲嘢長番多啲肌肉去保護韌帶,大家可以多啲約我食飯呀。」