汪明荃留守無綫50年表忠:我同公司好夾!

20211126
東網電視
更多新聞短片
無綫頒發長期服務獎給旗下員工,今午(26日)於電視城舉行盛大頒獎禮,藝人張振朗、羅蘭及韋家雄等,紛紛獲得服務10年金牌,而汪明荃(阿姐)留守無綫50年,成為頒獎禮上風頭躉,獲邀上台領獎時,全場起立掌聲雷動,阿姐簡單表示:「呢度好似一家人咁,多謝大家包容我,士氣好緊要!」
悉心打扮見證重要時刻的阿姐,事後接受訪問表示感動:「有成200幾位同事得獎,其中服務20至30年嘅同事都仲有好多留喺度。(日前你喺工作室攞晒咁多年啲服務金牌合照。)係呀,我覺得大家會有興趣睇吓啲服務金牌,次次都唔同造型,10年嗰個擺咗成40年,啲膠摸到甩晒。」她坦言加入無綫至今,從來沒離心:「我係一個好長情嘅員工,同公司好夾,多謝公司一直畀支持同畀機會我,咁我自己亦都好堅持、捱得、忍得同守住崗位。(諗住點都一直做落去? )我做得會做,就算做幕後都可以,肯做實有崗位畀你,只係我暫時仍然希望目前發展。(嚟緊想接受啲咩挑戰?)我依家最緊要係12月西九嘅粵劇演出,8日做11場,係一次體力大考驗,依家已經努力準備。(拍劇?)呢個暫時唔會考慮住。」
另外,無綫總經理曾志偉亦有現身頒獎禮上,為眾獲獎員工打氣,但完場時記者要求訪問,未知是否為免令老友譚詠麟桃色新聞發酵,志偉未有停下做訪問,最後由工作人員「擋駕」,表示趕開會即匆匆離場。