射入3分波被質疑造假!張繼聰嬲爆晒打波相反擊

2021年11月27日 11:02
東網電視
更多新聞短片
藝人張繼聰向來都好鍾意打籃球,佢前日(25日)喺社交網上載同兒子張瞻去打波嘅片,睇到佢同兒子射3分都穿晒針,相當犀利!但係條片出咗之後,有唔少網民竟然話佢哋造假「唔入又扮入」,搞到佢好嬲豬!
佢尋日(26日)喺社交網晒自己多年嚟喺籃球比賽嘅相,反擊話佢唔識打波嘅人,仲趁機回顧一下自己打波英姿,自嘲「我真係叔叔鳥」,佢留言:「唔係話我打得叻,不過我嘅青春,係喺籃球場上面度過,幾多汗水呀大佬,畀人話唔識打波,你話傷唔傷心?」而其中一張最特別嘅相,係睇到同佢同中國男子籃球職業聯賽CBA球員比賽,佢仲話:「你有冇試過畀CBA嘅球員Block Shot?離晒手拍走嗰隻!我就試過啦!」唔少網民都力撐佢識打波「睇個出手動作係咁正宗,就知肯定係打開波!」、「起手動作好穩,假不了」唔知佢得到咁多網民支持,有冇下番啖氣呢?