歌手變演員嗌興奮　JW打定輸數拎唔到女配角

歌手JW（王灝兒）、陳柏宇及林奕匡今日（27日）現身將軍澳全新臨海商場Ocean PopWalk海天晉滙的活動，聯同新鴻基地產（銷售及租賃）代理有限公司董事鍾秀蓮，一同為商場進行揭幕儀式。JW表示剛得知憑無綫劇《青春本我》，在台慶頒獎禮角逐女配角、飛躍進步獎及歌曲獎，她説：「第一次以演員身份而唔係歌手身份得提名，感覺好新鮮。（有冇信心？）機會好微啦，不過已經好開心，有提名我當係今年嘅安慰獎啦，嚟緊呢年想集中做番多啲非劇集歌。」她又表示想歌影雙線發展，問到會否感覺公司側重資源於星夢歌手，她說：「又唔覺喎，公司都好支持我哋做歌，可以百花齊放先最好，見到佢哋有成績我都會好開心。」

談到媽媽身體情況，她指媽媽已做手術切除腫瘤，現正根治中：「本身以為好細個瘤，點知愈Check愈發現好大個，所以大家都要定期做身體檢查。（有冇擔心遺傳？）都有，所以同家姐即刻做檢查，其實我30歲打後已經每年做檢查，依家飲食同休息都會更注重，同埋都戒食牛肉一排。」