撐混血表妹紅落去 姜濤叫大家留意埋MIRROR

2021年11月27日 17:04
東網電視
更多新聞短片
人氣男團MIRROR今日(27日)派出「半打鏡」做代表,包括隊長Lokman、姜濤、Jer、Anson Kong(江𤒹生,AK)、Tiger及Frankie出席《新城勁爆頒獎禮2021》記招。問到6子可對攞歌曲、組合獎有信心?Frankie以肯定語氣表示有:「信心係一定要有!」Tiger識趣接着說最睇好Lokman拎新人獎,惟Lokman眼見一眾新人比自己資歷淺,笑言剛才上台時都有點兒尷尬,AK再加把口笑言:「你以舊人姿態爭新人獎!」笑問其餘5位兄弟將票數全投隊長?AK醒目答:「兩個都投,為咗撐兄弟不惜開到幾個Email Account同出多幾部電話!」之後又指他們人多勢眾,追住前輩張敬軒「出擊」,成「蟻多摟死軒」局面,Lokman謙指沒有:「多謝大家支持,佢一個可以打低我哋4個呢!就算加埋都未必夠佢嘅力量!」
講到姜濤同中英混血兒表妹多年前拍落的Vlog,近日被Fans瘋傳,更有身在溫哥華的「姜糖」成功野生捕獲表妹,大讚索爆!姜濤聞言表示片段已是多年之前,提到亦獲Fans讚其英文口音好聽時,其他成員即抵死「騷Quali」狂講英文,當Lokman問到「How about your cousin?」姜濤笑爆嘴說:「Good!」續問有否想過意外捧紅表妹?他直言沒有想過:「希望大家留意表妹之餘,都留意埋MIRROR!(表妹有冇講參與咗你啲Fans活動?)最近都少同佢聯絡,之後再問吓佢。(定係佢紅咗唔得閒理你?)希望佢繼續紅落去,哈哈!」
再談及姜濤最近推出的紀錄片,當中自覺疑似患抑鬱症,他澄清現時身體狀況好好,還自嘲當時未確診:「嗰段時間可能壓力比較大,所以先亂諗嘢,依家好番好多,同埋當時都係懷疑自己有抑鬱,未確診嘅,哈哈!(有冇睇醫生?)冇去睇抑鬱症,但有做身體檢查,依家唔再亂諗嘢,而第三集都就嚟推出。」
至於AK亦有主持ViuTV節目《Have A Sweet Gym》,教做運動同時化身貼品師整甜品,自豪說獲好友製作獨一無二的圍裙,問到若頒獎禮得獎,會否親自設計特色甜品?他指就算沒有得獎都想煮餐飯請兄弟食,但要等齊人得閒。
另外,Jer及Tiger明天(28日)將參與慈善桌球挑戰賽,更會聯手向桌球運動員傅家俊挑機,Jer指有桌球底子的Tiger已準備就緒,知道對方日日練波,AK直言若Tiger不是成MIRROR隊員,便是奧運桌球高手!Tiger透露會使出「私家Cue」(球桿),應戰,甚至大口氣笑話:「聽日有信心呀!對傅家俊之嘛!」笑翻其他隊友嘲笑:「信心同實力唔係掛鈎嘅!」相反,Jer自嘲負責搞笑,最緊要大家開心!