一個唱歌一個做戲！黎瑞恩邵美琪想開檔賣魚蛋

藝人黎瑞恩（小恩子）今日（27日）以大使身份聯同好友邵美琪（Maggie）現身香港展能節，跟傷健人士一齊製作曲奇。小恩子有感大眾對小朋友及長者較為關注，但對傷健人士少有提及，她表示日後會多幫助他們，Maggie稱會跟着小恩子一齊有力出力以回饋社會。

講到製作甜品，Maggie坦言一竅不通，反而小恩子經常會為朋友組織興趣班，讓大家一齊製作肥皂及甜品，Maggie笑言：「我哋聚埋一齊唔係打麻雀，而係做活動小組。」又指跟小恩子幾乎日日見面。小恩子坦言2人一個唱歌，一個演戲，完全是風馬牛不相及，更從未合作過，能成為好友全因大家起用同一個化妝師：「佢係一個好善良嘅人，所以我吸佢過來幫手做慈善，希望多啲有心人支持。」Maggie透露暫時未有工作，現主力做慈善，問到她跟小恩子在工作上可有合作機會，小恩子說：「應該比較難，因為佢係高級組演戲。」Maggie隨即補充指對方是高級組唱歌，並開玩笑稱2人可一齊做小販賣魚蛋。