V＠BTS玩快閃車頭蓋打掌印　粉絲豪爆「問價」！

韓國人氣男團防彈少年團（BTS）紅到爆炸，日前佢哋喺美國出席全美音樂頒獎禮2021（AMAs），仲拎埋「年度藝人獎」，認真犀利！BTS出席完完頒獎禮之後，喺洛杉磯街頭玩快閃，即場表演咗《Butter》、《Dynamite》、《Permission to Dance》等3首歌曲，據知佢哋當時係拍緊節目《The Late Late Show》。

而美國新聞主持Cher Calvin當日咁啱揸車經過，佢仲有幸坐頭排睇晒成個表演！呢個咁難得嘅機會，Cher梗係拍片擺上社交網晒命，片段中仲見到BTS成員V喺佢架載上面打掌印，事後Cher拍片證實車頭蓋上面真係有V嘅掌印！有唔少BTS粉絲即時殺到Cher嘅社交網，係咁向佢「問價」，話要買咗佢架車咁話，仲有粉絲豪爆話：「你開價啦，我即時匯錢！」究竟依家係架車貴定隻掌印貴呢？