挑機傅家俊!Tiger出動「私家Cue」都輸畀Jer

2021年11月28日 20:01
東網電視
更多新聞短片
人氣男團MIRROR今日(28日)派出隊中桌球技術技高一籌的Jer(柳應廷)及Tiger(邱傲然),參與慈善桌球挑戰賽,同場還有香港桌球「一哥」傅家俊(Marco)及年僅11歲的桌球好手廖予生(Shaun),活動先進行兩場同Fans的熱身回合,後4人再分成2組打慈善賽。
見Jer及Tiger身穿專業桌球選手服式,由現場幾百名Fans的歡呼聲之下型爆登場!二人甫見Marco即互笠高帽,互相表明是對方Fans,而Marco亦有講到邀請Jer及Tiger的原因,是留意到他們於《調教你MIRROR》中的球技有板有眼,Jer笑言對今次慈善賽零勝算兼預料只做「執波仔」,不過他說賽前有約Marco練過波,能夠同對方切磋球技已經深感榮幸:「同埋好佩服佢哋喺比賽嘅時候,原來承受咁大壓力,我依家都好大壓力!」Marco「回禮」笑言:「你哋多人睇啲!」
首先進行熱身回合,Jer及Tiger分別帶領兩隊Fans,又身兼軍師示範兼「貼身」指導隊員,更搞笑「出手」、伸手給Fans用作私家「枕手」!而Tiger甚至出動「私家Cue(球桿)」應賽,但都不敵狂「出貓」的Jer夠「智慧」!輪到進行慈善賽時,Jer抽籤同Marco一組、Tiger順理成章拍Shaun,曾自言是搞笑擔當的Jer一開波就「撻Q」,誤入白波送分給對手,後來Marco使出「清枱」神技,最終以74比50勝出慈善賽,連計兩個熱身回合,即時Jer連贏3場!
Jer成大贏家
活動後兩子受訪,談到Jer成大贏家,他稱因為有Marco幫手,加上有點兒運氣:「我係嚟搞笑㗎!(所以一嚟入白波?)喺專業球手面前真係搞笑!(你係咁出貓。)呢個就喺ERROR身上學番嚟嘅!Tiger行親民路線,就冇出貓,我嘅球技真係唔及佢嘅!」Tiger笑言因為忘記熱身賽是計時,掛住同Fans交流,同時亦自認球技「渣」,問到出動「私家Cue」仍不能逆轉勝可有失望?他直言不看重勝負,最緊要開心。
提及Jer全程借用Marco的私家球桿,他不禁大叫好大壓力:「好驚一唔小心就整花!」問到二人會否再向Marco下戰書?他們表示若然有機會當然好,能夠做慈善之餘,又可以寓工作於娛樂,並直言好想拜對方為師!
跌出叱咤五強
另外,Jer跌出《叱咤》「我最喜愛男歌手」五強,他坦言不會覺得失望,一路以來都希望可以用作品感染大眾:「有回響就已經好開心,亦好滿意作品,反而係擔心Fans會失望,因為佢哋有所期望,我就同佢哋講,自己都係出道短短幾年,仲有大把機會,依家更重要係做好音樂。」