范丞丞Cosplay《優獸大都會》　被懷疑係臥底！

內地女星范冰冰細佬范丞丞參加選秀入行，依家已經升呢做男一，佢擔正嘅處男作最近上映，演出大獲好評！而成為綜藝節目常客嘅佢，最近同賈玲、楊洋等為內地真人騷《青春環遊記》第三季擔任嘉賓，一齊大玩Cosplay，化身做動畫《優獸大都會》嘅成員，范丞丞就化身成狐狸阿力，同大家一齊搵臥底線索，睇吓佢哋入面當中底邊個先係臥底！

佢哋要喺食飯嗰陣玩問答遊戲，要答啱問題先食到相應嘅餸菜，答錯嘅話嗰味餸就冇得食啦！而佢哋要喺問答當中搵臥底線索，睇吓邊個答錯或者明顯答得好慢，嗰個就有可能係臥底，結果范丞丞同楊洋都被人懷疑係臥底，但係結果係點就要下回再分曉！食完飯之後，佢哋就一齊去做運動，范丞丞打籃球技術唔錯，佢嘅「轉波神技」可謂出神入化，轉到唔識停呀！而楊洋亦有展示踢毽技巧，可謂姿勢十足，相當有型！而網民睇見佢做運動咁犀利，都羨慕佢哋有良好體魄，認為身體健康就係幸福！