許凱敷住Mask出街　挑機面膜達人范冰冰！

有「面膜達人」之稱嘅內地女星范冰冰，仲有「新疆四美之一嘅迪麗熱巴，為咗保持無敵靚樣，無時無刻都會爭取時間敷Mask，甚至唔介意敷住面膜出街，原來身高1米85嘅內地型男許凱亦有此好，被粉絲野生捕獲出街都敷Mask，因此多咗個「面膜凱」嘅稱號！

有粉絲喺社交網出post，話有日喺拍攝現場追星，當佢發現許凱嘅保母車駛到時，即時提高警覺性，諗住車一開門，就舉手機拍低佢偶像個靚仔樣，點知落車嗰個的確係許凱，但個樣都完全同咗，仲一度以為時運低，日頭白白都會撞鬼添！

咁又難怪個粉絲有呢個諗法，因為許凱塊面白到嚇人，仲係冇眼冇鼻冇口，冇晒輪廓嗰隻，不過睇真啲，原來佢撻咗去保濕面膜喺塊面度，可能佢自己都覺得「好異相」，所以全程耷低頭，急腳咁閃咗入大廈度。

有粉絲留言爆許凱已經唔係唔係第一次敷住Mask出街，之前嗰次佢戴咗紅色打底再加個黑色口罩喺面，以為佢加強防疫可以先雙重保護，但就有粉絲踢爆，佢嗰個紅色打底口罩係聲稱有瘦下巴嘅面膜，事實證明許凱真係好貪靚，唔係扮嘅。