《青春本我》玩踢爆！姚焯菲喪NG　炎明熹離奇失蹤

無綫節目《聲夢傳奇》一班學員人氣高企，日前炎明熹（Gigi）、姚焯菲（Chantel）、鍾柔美（Yumi）及詹天文（Windy）組成女團After Class，推出新歌打造青春回憶，MV上架短短2日，觀看次數已突破20萬，氣勢強勁。佢哋主演嘅劇集《青春本我》即將播出，一班演員齊集玩大踢爆，力數NG王、遲到王！

講到最劇最多NG嘅人，矛頭竟清一色指向Chantel，而Chantel亦知衰表示：「係咪因為我成日笑呀佢哋話？」好友文凱婷更爆料指由於劇中Chantel與Rock（何晉樂）湊成一對，笑指Chantel頂唔順Rock嘅外表而失笑。至於問到遲到王，全劇亦一致認證Felix（林智樂 ）最常遲到，佢就解釋只係化妝遲到，正式拍攝時係準時，又趁機向幕後工作人員致歉。至於炎明熹（Gigi）就被爆拍劇時不時離奇消失，被導演開咪尋人，Gigi亦笑指自己經常「飛走咗」。