保錡翻唱《倒轉地球》致敬 陶大宇唔嬲:大家開心就得

2021年11月30日 14:16
東網電視
更多新聞短片
「師奶殺手」陶大宇最近人氣勁過MIRROR,佢演唱嘅《倒轉地球》突破天際,加上「水撥式」嘅舞姿,真係勁洗腦!因為大宇哥真係人氣太勁,ERROR成員保錡拍片扮佢唱《倒轉地球》致敬,佢留言:「最近大愛一首歌,不得不重唱一次,無論表情和語氣,都表現得10分到位,所以決定表演給大家看,重複睇了100次的《倒轉地球》。」見保錡模仿大宇哥嘅表情非常神似,佢仲配埋對比片畀大家睇,真係笑到網友碌晒地!
另外,有網友實在太迷大宇哥喇,仲為佢開咗個社交群組「我老婆鍾意咗陶大宇導致婚姻關係破裂關注組」,依家已經吸咗6,300個粉絲加入,人氣絕對唔比MIRROR差!網友仲喺群組度抵死留言:「我諗依家通關最大誘因,就係可以上去睇大宇商場Live!」、「今年亞太男同金曲金應該都呼之欲出。」、「大宇世一,樂壇欠大宇一個交代。」
大宇接受東網訪問,問到有冇睇過保錡條扮嘢片,同埋有冇嬲豬?佢好大方咁話:「我冇嬲,佢之前都扮過我啦!最緊要帶到歡樂畀大家,大家開心就得!」佢仲話唔介意同ERROR合作,但要提早通知佢一聲!再問到佢知唔知粉絲為佢開咗社交網群組,佢話:「我有留意到,笑到我喊,網友真係好有創意同埋好抵死!」講到有網友推佢拎叱咤「我最喜愛的男歌手」,佢搞笑話:「佢哋敢畀我,我就敢攞,接古天樂棒!」