糖妹想邀請陶大宇上《勁歌金曲》

歌手糖妹為無綫節目《勁歌金曲》錄影，對於「師奶殺手」陶大宇翻唱經典歌《倒轉地球》成為熱話，糖妹表示至今還未觀賞，故被身邊朋友頻頻取笑好Out，在場記者隨即給她翻看片段，睇到糖妹眉飛色舞，更模仿大宇唱腔，場面搞笑。

糖妹笑指大宇唱腔與著名男高音莫華倫相似：「幾好呀！呢排身邊好多朋友討論，好開心喺年底有樣嘢帶到歡樂畀大家，其實商演好多時都聽唔到自己把聲，所以我都試過用呢啲莫華倫式唱出嚟，好明解。」更指大宇以往於電視劇角色威風凜凜，沒想過他會有如此可愛的一面。

問到會否邀請他上節目任嘉賓？糖妹表示：「可以嗎？上嚟唱《倒轉地球》？都係好事，因為個節目需要多啲新嘅元素，多啲前輩上嚟都好。（咁咪似《流行經典50年》？）舊歌要不停要重溫，好多歌都好好聽。」

而同場的林奕匡則透露近日為歌手葉巧琳寫歌，原來二人相識10年：「幫佢寫歌都有壓力，首歌係講佢喺呢行雖然用咗好多時間，但都覺得值得。」至於將在本周日舉行慈善音樂會的安俊豪，就預告屆時將挑戰跳唱及高難度歌曲，寄望為觀眾帶來驚喜。