入圍「我最喜愛的女歌手」5強!陳凱詠當贏咗:因為好多Haters

2021年12月01日 15:02
東網電視
更多新聞短片
環球歌手陳凱詠(Jace)、沈殷怡、曾比特等,今日(1日)出席運動用品活動。講到Jace將於下周開騷,她笑言擔心:「因為好多嘢重新編排,但仲未排好,時間好緊迫。(跳舞會有突破?)會表演一段從未表演過嘅新才能,配合跳舞,練咗一段時間,但未排。」她又謂今晚會試歌衫,笑言會試真啲,以免重現「甩裙意外」:「會加多幾個扣,或者加鎖,哈哈。」講到嘉賓,她就賣關子:「會有幾個,係我啲老友,兩場都會唔同,除咗唱歌,都會同佢哋多啲交流。」
而講到入圍「叱咤樂壇我最喜愛的女歌手」最後5強,Jace笑言:「好黐線,完全冇諗過,意義好大,因為其實有好多Haters,總有人唔鍾意你,而呢個名單係投票出嚟,所以好似打咗支強心針,原來有咁多人鍾意我,好感動,入到5強已經當自己贏咗。」
至於沈殷怡就表示有份演出葉念琛執導的電影將上映,飾演第三者「琪琪」:「今次有啲特別,唔係就咁狐狸精,有好多內心戲,好大挑戰。」她又笑言有問對方為何找她演戲:「佢話有睇上年巡禮,見到我做MC,覺得我背稿好叻,佢話啱晒啦,因為角色有兩頁紙對白,都叫做有啲才華,哈哈。」她又希望可以繼續進軍大銀幕拍戲,亦有上演技班學戲,下年亦會開拍親情的新劇。