華燈初上｜艷壓林心如　台灣影帝反串「媽媽生」

由台灣女星林心如主演兼擔任製作人嘅台劇《華燈初上》，一開播即成為熱話，更成為線上平台台灣地區排行榜冠軍。第一季卡士陣容已相當鼎盛，有三大女神林心如、楊謹華及郭雪芙，但原來好戲在後頭，第二季唔單止有金馬影帝加盟，仲有突破成演出，保證驚喜連連！

呢位影帝級男星就係曾與蔡卓妍（阿Sa）合演電影《非分熟女》嘅台灣藝人吳慷仁，今次佢更化身變性人夜總會老闆，挑戰男扮女裝，與「媽媽生」林心如打對台。雖然首季佢仲未正式登場，不過預告片已率先公開其女裝扮相，見佢一身打扮勁有貴氣，十足中年貴婦，驟眼睇完全唔覺係男兒身，簡直零違和！唔少網民都直指其演出令人聯想起藝人姜皓文於電影《翠絲》男扮女裝嘅扮相，紛紛期待第二季播出。