Chok爆打拍子　黎耀祥結他檔陶醉晒琴技

三屆視帝黎耀祥最近喺無綫台慶劇《拳王》中扮反派「石傲山」，大受歡迎，被讚「奸到出汁」，雖然有劇集見街，不過依家佢就身在內地工作，估唔到原來佢玩樂器都有一手！佢喺短片平台上載新片，見佢坐喺街頭結他檔玩兩手結他，手到拿來咁撥弦，仲對住鏡頭擺晒甫士又用腳尖打晒拍子咁，一邊彈一邊合眼，不知幾陶醉！估唔到今次佢騷Quali，仲吸引到久未露面嘅女神黃翠如留言大讚好型，睇嚟佢轉行文藝路線都一樣有市場啵。