自導自編兒童音樂劇　泰臣獲得變態滿足感

藝人泰臣（翟凱泰）執導及編劇的合家歡音樂劇將於聖誕節期間開始演出，他坦言做編劇有難度：「要將腦入面古靈精怪嘅idea變做有紋有路嘅故事，同要大人細路都睇得開心，呢個係喜劇為主，我有喜劇感就易啲，而做導演難度更高，因為自己身為導演同編劇，有時會出現盲點，我一廂情願覺得咁演，但可能演員睇法唔同，我嗰刻就要選擇仲堅唔堅持自己想法，演員可以有第二種形式呈現會再更好玩，都會尊重演員意見。」

近期他正密密排練，坦言排得很開心：「今次係兒童劇仲要喜劇，又可以強迫演員講我度嘅gag，有種好變態嘅滿足，同埋每日排練前玩啲遊戲，可以令大家好開心開始排練。」講到其他工作，他表示有拍戲，現時亦有做電台主持工作：「可以訓練自己應變能力，即時反應靈活啲，都希望自己有潛質做星級主持同司儀。」